ILOILO–Gindakup sang police ang ginatudlo suspect nga nagtiklod sa iya live-in partner nga nasapwan patay sa punungan sa Barangay Nanding Lopez, Dumangas kahapon sang aga, Marso 24.
Suno kay Police Staff Sergeant Terrence Soria, imbestigador sang Dumangas Municipal Police Station, nasapwan sang mga residente sa palibot ang bangkay sang 55-anyos nga babaye nga si Elsa nga nagalutaw na lang sa punungan.
Sa pagpangusisa sang police, antes nasapwan may nakakita sa babaye kag iya 63-anyos nga live-in partner nga naga-away.
Sa panaysayon sang witness suno sa police, mga las-7 kagab-i sang nabati-an niya nga nagaba-isay ang mag-live in kag nagapangayo sang bulig ang babaye. Nakita sang testigo ang duha sa kilid sang suba pero ginpabay-an niya lang tungod masami man niya nga makita ang duha nga naga-away.
Nahibaluan man sang police nga nag-inum-inom ang mag-live in sang Sabado sang gab-i kag posible nagresulta sa inaway.
Kaina sang aga, nasapwan na lang ang babaye nga nagakulob sa punungan kag wala sang pilas, suno sa police.
Gindakup sang police ang lalaki nga live-in partner sa ila hot pursuit operation. — via Aksyon Ma. Kayla Tingzon
