ILOILO – Ginkumpirmar sang Iloilo Provincial Veterinary Office nga naka-record sang kaso sang African Swine Fever (ASF) ang Badiangan kag Zarraga, Iloilo.
Suno kay Provincial Veterinarian Darel Tabuada, nagpositibo ang mga blood samples nga ginpangkuha sa mga baboy sa tag-isa ka barangay sang nasambit nga mga banwa.
Bangud sini, 70 na ka mga barangays halin sa 14 ka mga banwa ang apektado sang ASF kag 2,363 na ka mga baboy sa probinsiya ang nagpositibo sa nasambit nga virus.
Padayon naman nga gina-monitor sang PVO ang tanan nga banwa sa probinsiya.
Ginahaylo ni Tabuada ang publiko nga mag-report gilayon sa ila tagsa ka mga Municipal Agriculture Office (MAO) kun may sintomas sang ASF ang ila nga mga ginasagod nga baboy.
Magluwas sa Badiangan kag Zarraga, may na-record na nga kaso sa Oton, San Miguel, New Lucena, Leganes, Alimodian, Banate, Barotac Nuevo, Mina, Dumangas, Santa Barbara, Barotac Viejo, kag Janiuay.
