ILOILO — Patay ang bana samtang pilason ang asawa sang na-hit and run sang ginpahayag sports car sa atubang sang Monticello Intimo subdivision sa Barangay Pandac, Pavia pasado las-10 sang Hunyo 1 sang gab-i.
Suno kay Police Staff Seargent Crisande Maquiling, imbestigador sang Pavia Municipal Police Station, nakaagum sang pilas sa ulo ang biktima nga gintunaan sang iya kamatayon.
Samtang padayon pa nga ginabulong sa ospital ang iya asawa nga may pilas sa nagkalain-lain nga parte sang lawas.
Sa imbestigasyon sang police, halin sa Bangga Singko ang mag-asawa nga naga-angkasanay sa mountain bike sang nabungguan sang sports car nga halin sa C1 Road.
May nakakita man nga isa pa gid ka driver sang salakyan nga nagasunod sa sports car nga nagliko sa Deca Homes Phase 3, suno sa police.
Nakita pa sang mga security guards nga yara sa guard house ang pagsulod sang salakyan pero sang gin-check sang police ang kuha sang CCTV cameras sa subdivision, wala sila sang may nakuha nga footage tungod brownout kag wala ang mga ini naga-andar.
Sa pagpangusisa sang police sa subdivision, wala man sang residente nga nagapanag-iya sang sports car.
Sa subong, padayon ang pagpangita sang kapulisan sa driver. — via Aksyon Maria Kayla Tingzon
