Nasapwan ang hublas nga bangkay sang lalaki sa kilid sang daan nga pantalan sa Brgy. Ortiz, City Proper subong nga aga.
Nakit-an sang residente ang bangkay sang lalaki nga wala sang ginasuksok nga bayo. May itom nga relo sa wala nga kamot, kag gold nga kulintas.
Ginkumpirmar ni Gerardo Dilig nga ang iya nga bata nga si Ronel, 33-anyos ang bangkay nga nasapwan.
Si Ronel ang mangigisda nga na-missing sa Brgy. Namocon, Tigbauan sang Hulyo 23 sang hapon.
Ginsaysay ni Gerardo nga nagpangisda sila ni Ronel sang nakakas ang katig sang ila sakayan. Ginlumpatan ni Ronel kag ginkay-o ang katig pero nalipong siya tungod dalagku ang balod nga naga-igo sa sakayan.
Wala na naghalin sa sakayan si Gerardo tungod dalagku ang balod kag posible nga duha sila ang nalumos sang iya bata kon naglumpat man siya. — Aksyon Farrah Mae Morano
