ILOILO CITY — Dead-on-arrival sa ospital ang barangay tanod sang ginbuno sa Brgy. San Juan, Molo kahapon, Mayo 29.
Ini ang ginkumpirmar ni Police Captain Ryan Christ Inot, officer-in-charge sang Police Station 4 sa Molo.
Sa inisyal nga impormasyon nga nakuha sang Aksyon Radyo Iloilo news team, ginsaway sang tanod ang mga pamatan-on sa baybay nga sakop sang barangay nga indi maghinabuyanay sang bato.
Yara sa area ang suspek kag ginhambalan ang tanod nga lain nga grupo sang pamatan-on ang iya ginsaway.
Tungod sini, may natabo nga komosyon sa tunga sang tanod kag suspek. Ginpahayag nga naakig ang suspek gani ginlagas ang tanod.
Naabtan sang suspek ang biktima tungod natumba kag ginbuno sa likod nga parte sang iya lawas.
Nagpalagyo ang suspek pagkatapos sang insidente. — Aksyon Paula Elambayo
Nagresponde ang police sa lugar kag padayon ang hot pursuit operation sa suspek.
