ILOILO — Arestado ang barbero kag ginatudlo nga runner niya sa pagbaligya sang illegal nga druga sang nakuhaan sang P1.1 million nga balor sang suspected shabu sa drug buy bust operation sa Barangay Poblacion East, Oton.
Suno kay Police Major Marvin Villanueva, deputy chief sang Regional Police Drug Enforcement Unit (RPDEU), daku ang balor sang illegal nga druga nga nakuha sa mga subjects nga kanday alyas Noynoy, 38-anyos, kag Bandong, 23-anyos, tungod magluwas sa Oton nagabaligya man sila sang illegal nga druga sa Iloilo City.
Naglab-ot sa 125 grams sang suspected shabu ang na-recover sa operasyon.
Sa duha ka bulan nga monitoring sa subjects, nahibaluan nga ginatabo lang ni Noynoy ang supply sang illegal nga druga nga iya ginabaligya sa plaza sang Oton ukon nagakadto pa siya sa Iloilo City.
Ginahibalo pa sang kapulisan kon diin nagahalin ang supply sang illegal nga druga nga ginabaligya sang subjects.
Ini ang una nga tion nga nadakpan ang duha sa anti-illegal drug operation. — Aksyon Maria Kayla Tingzon
