ILOILO — Patay ang 25-anyos nga bata sang natiruhan sang iya amay sa Barangay Cabacanan Rizal, Alimodian.
May pilas sa wala nga parte sang tiyan ang napatay nga si alyas Kevin.
Suno kay Police Lieutenant Rolly Sorongon, Deputy Chief sang Alimodian Municipal Police Station, naka-inom sang makahulubog nga ilimnon ang amay nga si alyas Jim, 61-anyos, sang natiruhan ang iya bata.
Base sa imbestigasyon sang mga pulis, halin sa birthday party ang amay.
Pasado las-10 sang gab-i, gindul-ong na sa ila balay si Jim sang iya abyan nga si alyas Junmar tungod nga hubog na kag madamo na sang ginahambal nga indi maayo pamatian.
Pag-abot sa balay ni Jim, may pagba-isay sa tunga nila tubtob nga ginsumbag niya si Junmar.
Nagsulod sa ila balay ang amay para magkuha sang pusil kag nakita ini sang iya bata rason nga iya ginsundan.
Punggan lang kuntani ni Kevin ang iya amay, apang napitik ni Jim ang gatilyo sang homemade 12-gauge shotgun kag na-igo ang iya bata.
Na-recover sang mga pulis ang pusil nga gingamit sang amay.
Preso sa Alimodian MPS ang amay nga natalana pasakaan sang kaso nga parricide. — Aksyon Maria Kayla Tingzon
