ILOILO CITY—Ginpa-reactivate ni Mayor Raisa Treñas ang “Batang Pandilla Program” nga una gintawag nga Project BONG (Bringing Order to the Nemesis of Gang) sang Iloilo City Police Office-Women and Children Protection Desk (ICPO-WCPD) angut sa natabo nga rumble sang 22 ka pamatan-on sa Gaisano ICC Grounds sa San Rafael, Mandurriao nga ginadalahigan sang 19 ka menor-de-edad.
Ang “Batang Pandilla Program” nga ginatawag nga “Rise for Protection” sa idalum sang pagpamuno ni Mayor Raisa Treñas may tinutuyo nga buligan ang mga pamatan-on nga involved sa mga street crimes nga malikaw sa dugang pa nga crime exposure kag magbag-o.
Ini ang mandu sang alkalde sa meeting upod kay ICPO Director, PCOL Kim Legada, mga hepe sang police stations sa siyudad, ICPO-WCPD, City Social Welfare and Development Office (CSWDO), kag kanday Councilors Sedfrey Cabaluna kag Nene De la Llana tungod sa kahangawa nga mabalik ang mga gangs sa siyudad.
Suno kay Ms. Joy Fantilaga-Gorzal nga spokesperson sang alkalde, pasangkaron sang “Rise for Protection” ang education campaign kag lectures sa mga eskwelahan sa siyudad parte sa mga gangs kag kon paano malikawan ang gang recruitment.
Ginmanduan man sang alkalde ang CSWDO nga pamunuan ang pagpatuman sang mga diversion programs kag maghimo sang updated action plan para sa mga kabataan nga involved sa kinagamo.
Ginapapartisipar sa amo nga action plan ang nagkalain-lain nga sektor pareho sa mga barangay officials, ginikanan, kag eskwelahan.
Sunod nga ipatawag sang alkalde ang Schools Division of Iloilo City tungod 19 sa mga involved sa rumble ang lunsay mga estudyante sa City Proper, Molo, kag Arevalo.
Nagkomiter man ang kapulisan nga pasangkaron ang police visibility sa mga strategic locations sa siyudad kapareho sang plaza kag merkado.
*NOTE: “Pandilla” ang Spanish terminology sang English word nga “Gang.” — Aksyon Marvin Malificiar
