Bike Patrolling sang mga pulis pamaagi sang PRO 6 agud padayunon ang police visibility bisan mahal ang gatong

Indi upang ang pagtimbuok sa presyo sang gatong agud makapatrolya ang mga pulis.

Ini ang tinutuyo sang bike patrolling sang Police Regional Offiec 6 nga ginsuguran sang Semana Santa kag padayunon ang deployment sa dalanon.

Suno kay PRO6 Director PBGEN Josefino Ligan, pamaagi ini agud mapasangkad ang police visibility bisan ginalimitahan ang paglibot sang mga mobile patrols tungod sa nagamahal nga presyo sang gatong.

Na-schedule kon Martes kag Huwebes ang bike patrolling kag nagsugod kahapon.

Singkwenta (50) ka personnel sang PRO6 ang naka-deploy, lakip ang mga miyembro sang Regional Staff.

Nagasugod las-4 sa hapon tubtob las-6 sa gab-i ang bike patrolling.

Personal pa nga mga bisekleta sang mga pulis ang ila ginagamit pero maga-issue ang PRO6 pagkatapos nga ma-imbentaryo ang ipagamit sa ila.

Naghatag naman sang direktiba si Ligan sa mga provincial offices sa pagpatuman sang amo nga lihok. — Aksyon Maria Kayla Tingzon