“Bodegera” sang mga drug personalities sa 4th District nakuhaan sang P3.4 million nga balor sang suspected shabu sa Dumangas

ILOILO — Tunga sa kilo nga suspected shabu ang na-recover sa buy bust operation sa Barangay PD Monfort North, Dumangas, kahapon, Disyembre 6.

Suno kay Police Lieutenant Gabriel Manguera, deputy chief sang Provincial Drug Enforcement Unit (PDEU), ang subject nga si alyas Jen-jen, 39-anyos nga residente sang Barangay Lagubang, Barotac Nuevo ang ginapatago sang supply sang illegal nga druga sa Quarto Distrito.

Magluwas sa 4th District, naga-supply man si Jen-jen sang illegal nga druga sa Premier kag Segundo Distrito.

Nakaagi naman preso si Jen-jen sa kaso nga conspiracy sa iya bana nga nagabaligya sang illegal nga druga pero nakaguwa ang subject paagi sa plea bargaining agreement.

Na-recover sa operation ang tatlo ka dalagku nga pinutos sang suspected shabu nga ginabanta nagabug-at sang 505 grams kag may standard drug price nga P3.4 million.

Ginpabutyag ni Manguera nga nagpasalig si Jen-jen nga ihatag ang mga ngalan sang iya supplier agud sunod nga ma-monitor kag i-subject sa follow up operation. — Aksyon Maria Kayla Tingzon