ILOILO CITY — Patay ang 25-anyos nga bouncer sang ginbuno samtang nagakaon sang arroz caldo sa Brgy. San Felix, City Proper sang kaagahon sang Hulyo 26.
Suno kay Police Captain Michael Tuburan, officer-in-charge sang Iloilo City Police Station 7, papuli na halin sa iya nga duty sa Smallville complex ang biktima kag naghapit para magkaon sang arroz caldo sa tabok sang eskwelahan sa Brgy. San Felix.
Samtang nagakaon ang biktima, nag-abot ang wala pa makilal-an nga suspek nga may upod nga babaye kag lalaki. Nagkaon man sang arroz caldo ang tatlo.
Ginpahayag sang police nga may pagbinaisay nga natabo tubtob ginbasya sang suspek ang ginakaon nga arroz caldo sa biktima kag ginbuno sa tiyan.
Gindala sa ospital ang biktima nga may pilas sa tiyan pero napatay pasado las-6 subong nga gab-i.
Nagpalagyo ang suspek sakay sa motorsiklo samtang naglakat lang ang duha pa niya nga kaupdanan nga “daw wala sang may natabo”, suno sa police.
Gina-imbestigaran sang police ang motibo sa krimen. — Aksyon Paula Elambayo
