ILOILO — Nasulod sa sako bag ang lapsag nga ginbilin sa parkingan sang tricycle sa Barangay Cabugao Sur, Santa Barbara kagab-i, Enero 19.
Babaye ang lapsag kag buhi sang nakit-an sang call center agent sa amo nga lugar. Nakasab-it sa garahe sang tricycle ang sako bag nga nagaduag yellow.
Ma-duty na kuntani ang call center agent sang nakabati sang hibi sang bata halin sa sako bag.
Tungod sini, ginlantaw niya ang sulod kag nakit-an ang lapsag. Naga-angut pa ang pusod kag nagapalanggit-um ang bata sang nakit-an.
Nagpangayo sang bulig ang call center agent sa barangay kag gindala sa Health Center ang lapsag para sa nagakaigo nga pagbulong kag monitoring.
Gina-imbestigaran na sang Santa Barbara police kon sin-o ang nagbilin sang lapsag. — Aksyon Angel Mae Ciudad
