ILOILO — Nasunog ang Technology and Livelihood Education (TLE) kag Music, Arts, Physical Education, and Health (MAPEH) building sa Alimodian National Comprehensive High School sa Alibango Street, Brgy. Poblacion mga las 3 kaina sang kaagahon.
Suno kay Romar Cubin, Principal III sang eskwelahan , mga 11 ka classrooms ang nasunog sa diin pito ang ginaklasehan kag may tatlo nga nagaserbe stockroom sang mga costumes nga ginagamit sa cultural shows kag storage sang mga office supplies.
Ginpahayag ni Cubin nga nakabati sang nagasirit nga kuryente ang gwardiya nga naka-duty antes nagluntad ang sunog.
Sang nabatian sang gwardiya ang nagsirit nga kuryente iya ginkadtuan kag nakita nga nagakalayo na.
Nagtawag sa bombero ang gwardiya pero madasig nga naglapta ang kalayo tungod daan na ang mga classrooms sa TLE building sa diin naghalin ang kalayo.
Nalab-ot man sang kalayo ang canteen kag MAPEH building.
Gina-verify pa sang tagdumalahan sang eskwelahan kon may mga equipment kaangay sang TV, electric fan, computer kag printer nga nalakip sa mga nasunog. — Aksyon Maria Kayla Tingzon
