ILOILO CITY – Ginpahanugutan sang Iloilo City Council ang tatlo ka adlaw nga bulang kadungan sang Jaro Fiesta subong nga semana.
Sa special session sang konseho kahapon, Enero 31, gin-aprubahan ang “Resolution of No Objection” ukon RONO para sa bulang nga masugod sa Pebrero 1 tubtob 3.
Apat naman ka konsehal ang nagpamalabag nga aprubahan ang bulang nga ginalakipan nanday Councilors Frances Grace Parcon, Plaridel Nava, Alan Zaldivar, kag Rudolph Ganzon.
Enero 27 sang gin-deny sang konseho ang request nga RONO sang Iloilo Sportsmen nga maghiwat sang bulang halin Enero 30 tubtob Pebrero 2. Bisan wala sang RONO, gindayon gihapon sang Iloilo Sportsmen ang bulang sang Enero 30 kag 31.
Bangud sini, nagpasar sang resolution ang city council nga mag-conduct sang legislative inquiry sa paghiwat sang bulang kag ginpangayuan sang City Legal Office ang management sang paathag sa pagdayon sini.
Una na nagpahayag si Mayor Jerry Treñas nga pabor siya nga may bulang sa Jaro Fiesta tungod kabahin na inisang tradisyon kag madamo ang nagakadto sa syudad halin sa nagkalain-lain nga probinsya.
