DUMANGAS, Iloilo – Patay na sang nasapwan si Allan Jay Adorador, 33 anyos, sa Sitio Bulod Dos, Brgy. Pulao, Dumangas kaina sang aga.

Nakita ang duguon nga bangkay ni Adorador nga nagahigda sa kamalig.

Suno sa tiyo ni Adorador, tumandok sang Lambunao ang iya hinablos kag nagabantay sang iya pantatan.

Ginpabutyag sang tiyo nga wala man siya sang nahibaluan nga nakaaway ang iya hinablos. Pero ginbuyagyag sang tiyo nga may ginreklamo kag ginpapreso siya nga si certain Nognog nga tumandok sang Pulao tungod sa pagguba sang ila kamalig sa pantatan.

Suno naman kay Police Master Sergeant Ramon Baylon, Jr., posible nga mahamuok ang tulog sang biktima antes ginbuno. Sa inisyal nga pag-check sang police, may pilas sang pagkabuno sa dughan si Adorador.

Ginpabutyag sang residente nga malapit sa lugar nga may nakabati nga may nagsinggit mga las-10 kagab-i nga ginsundan sang pagtinaghol sang mga ido.

Padayon ang ginahimo nga imbestigasyon sang Dumangas police sa natabu.