ILOILO — ILOILO — Ginkawat ang iPhone 11 sang nagabantay sa kapehan sa sulod sang Robinsons Mall sa Pavia pasado las-10 kaina sang aga.
Suno sa biktima, ginbilin niya ang cellphone sa counter sang ila stall tungod mabakal sang pagkaon sa fast food restaurant sa sulod man sang mall.
Wala pa nakuha sang biktima ang iya gin-order nga pagkaon sang nakabatyag sang kulba gani nagbalik sa kapehan kag natukiban nga nadula na ang iya cellphone.
Tungod sini, gilayon nagtawag sa ila head office ang biktima gamit ang company phone.
Sang gin-review ang CCTV footage sang ila stall, nakit-an ang lalaki nga nakasuksok sang kalo kag face mask.
Lakip ang P500 nga kuwarta mga naipit sa likod sang iya cellphone ang nakawat.
Nagpakig-angut na ang biktima sa management sang mall pero wala pa niya ma-report sa mga pulis. — Aksyon Paula Elambayo
