Gin-ulan sang pagpakamalaot sa social media ang content creator nga si Euleen Castro nga ginbansagan nga “PambansangYobab” sang ginhikayan niya ang mga pagkaon kag ilimnon sang Café chain Coffeebreak sa Iloilo City.
Nag-ugat ini sa TikTok post ni Castro nga gin-post sang Lunes. Sang nagligad nga semana, nagpadulong sa siyudad kag Guimaras ang content creator.
Sa iya uploaded video, ginpahayag ni Castro nga madamo siya sang pagkaon nga gin-order pero bisan isa wala gid sang manumit lakip na ang ilimnon.
Nagpamuyayaw pa siya pagkatapos sang pagpanghikay. Si Castro ang una nga nagsikat sa TikTok tungod sa kaladlawan nga content ilabe na sa iya kadakuon.
Mahilig siya magkaon nga ginahimo niya nga content.
“NA-INSULTO”
Na-insulto ang Coffeebreak Café International Inc., sa pamaagi sang content creator nga si Euleen Castro sa pag-critic sa ila pagkaon kag ilimnon.
Base sa ginpaguwa nga statement sang management, na-intindihan nila nga indi pareho ang panabor sang tagsa-tagsa kag ginabaton nila ang constructive criticism nga dapat ipautwas sa talahaon nga pamaagi.
Suno pa sa tagdumalahan, ginapabugal nila ang efforts sang ila nga team agud makahimo sang positibo nga experiensiya para sa ila tagsa ka customers.
Sa masobra 20 ka tuig nga operasyon sang Coffeebreak, gina-abi-abi nila sa gihapon ang “room for growth,” kag ini ang labing una nga tion nga nakabaton sila sang maka-ilinsulto nga feedback.
Base naman sa ginpaguwa nga statement ni Mayor Jerry Treñas, suportado nila ang Coffeebreak kag dapat nga proteksyunan ang mga local businesses.
Nagpangabay man siya sa mga content creators nga mangin mahinalungon sa pagpautwas sang kritisismo tungod indi mapaktan ang mangin impact sini.
