ILOILO CITY — Ginsaylo sa hapon imbes sa naandan nga aga ang schedule sang Dinagyang Tribes Competition, samtang sa aga na imbes hapon ang Sadsad sa Calle Real para sa Dinagyang Festival 2026.
Pila lang ini sa mga pagbag-o nga ipatuman sang Iloilo Festivals Foundation, Inc. sa Dinagyang sa masunod nga tuig.
Ginpa-athag ni Prof. Eric Divinagracia, festival director sang Dinagyang, ginbutang sa aga ang Sadsad sa Calle Real agud ibalik ang naandan nga nagasadsad ang mga Ilonggo pagkatapos sang aga nga misa sa San Jose Placer Parish.
Samtang, ginsaylo sa hapon ang Tribes Competition kag himuon na lang sa Iloilo Freedom Grandstand kag Iloilo Sports Complex agud mas madamo ang makalantaw sa mas daku nga venue.
Natalana ang highlight sang Dinagyang 2026 sa January 25. — Aksyon Marvin Malificiar
