ILOILO CITY– Nakuhaan sang P408,000 nga balor sang suspected shabu ang district leader sang True Brown Style (TBS) Gang nga aktibo man nga traffic aide sa siyudad sang nadakpan sa drug bust operation sa Barangay Camalig, Jaro las-11 kaina sang aga.
Nakuha sa operasyon ang lima ka sachets sang suspected shabu nga ginabanta nagabug-at 60 grams.
Suno kay Police Captain Roque Gimeno III, chief sang City Drug Enforcement Unit, may ginikanan nga nagdangup sa Jaro police nga ginagamit sa pagbaligya sang illegal nga druga ang iya bata sang subject nga si alyas Saad, 39-anyos.
Dugang ni Gimeno, ginamolestiyahan pa sang subject ang mga miyembro sang gang kon indi magbayad sang ila weekly dues.
Ginkumpirmar ni Traffic and Transportation Management Office head, retired Col. Uldarico Garbanzos nga aktibo nga traffic aide ang subject kag nakabaton man siya sang impormasyon may kaangtanan sa iya involvement sa gang. — Aksyon Maria Kayla Tingzon
