ILOILO — Dakup ang 25-anyos nga residente sang Brgy. Calaparan, Arevalo sang nakuhaan sang malapit P1 million nga balor sang suspected shabu sa drug bust operation sang Regional Police Drug Enforcement Unit (RPDEU) 6 kahapon sang hapon, Pebrero 8.

Suno kay Police Major Marvin Villanueva, deputy chief sang RPDEU 6, madamo sang nagakadto sa balay sang subject nga si alyas Teban, gani gin-verify nila ang impormasyon tubtob natukiban nga nagabaligya siya sang illegal nga druga.

Nakabaton man sang impormasyon ang mga otoridad nga “downline” sang anay drug personality sa Iloilo City nga preso na sa New Bilibid Prison sa Manila ang subject, gani ila ini nga gina-verify.

Dugang ni Villanueva, may naga-motorsiklo nga nagadul-ong sang illegal nga druga sa balay ni Teban pero indi niya kilala tungod sa Manila ang iya contact kag ginapadul-ong lang.

Naglab-ot sa 135 grams ang kabug-aton sang pito ka sachets kag isa ka daku nga putos sang suspected shabu nga nakuha sa operasyon. — Aksyon Maria Kayla Tingzon