ILOILO CITY – Ginrekomendar sang Department of Public Works and Highways 6 nga partial opening sang Ungka Flyover para sa mga light vehicles.
Ginpaathag ni DPWH 6 OIC, Engr. Sanny Boy Oropel nga ini ang nadesisyunan makaligad ang ila consultation sa third party consultant, kay DPWH secretary manuel bonoan kag kay DPWH undersecretary for regional operations Roberto Bernardo, sa tuyo nga makahatag sang convenience sa publiko.
Magluwas sini, wala na suno sa iya sang may na-monitor nga paghulag sa mga haligi sang flyover base man sa gin-conduct nga static kag load test sang ahensya.
Sa press conference sang DPWH 6 kahapon, ginpahayag ni Oropel nga buksan ang flyover halin las 5 sa kaagahon tubtob las 9 sa aga kag halin las 4 sa hapon tubtob las 8 sa gab-i.
Lakip sa mga light vehicles ang traditional jeepney; private cars kag iban pa.
Nagahingyo naman si Oropel sang diutay nga inadlaw agud makompleto ang ibutang nga mga traffic bollards sa ibabaw sang flyover antes buksan sa publiko.
Plano man sang DPWH 6 nga mag-conduct sang dry run subong nga semana suno pa kay Oropel.
TEMPORARY LANG
Mangin temporaryo lang ang partial opening sang Ungka Flyover samtang wala pa na-release ang budget para sa pagpakay-o sang infrastructure.
Ginpahayag ni DPWH 6 OIC, Engr. Sanny Boy Oropel nga sa tiun nga i-release sang DPWH central office ang budget para sa rectification, siraduhan man ang flyover.
Tungod sini, nagapangayo na sang pag-intiende kag konsiderasyon si Oropel sa publiko.
Gin-athag man niya nga wala pa sang timeline para sa pagpakay-o sang flyover.
Una na ginpahayag Engr. Oropel nga i-demolish ang tatlo ka salog nga nakatungtong sa ikaapat, ikalima kag ikaanum nga haligi agud nga makasulod kag maka-position ang mga heavy equipment.
