ILOILO — Napatay samtang ginabulong sa ospital ang driver sang motorsiklo nga nagsaka sa center island kag nakabunggo sa poste sa Barangay Balabago, Jaro kahapon, Disyembre 20.
Suno kay Patrolman John Carl Impreso, imbestigador sang Traffic Enforcement Unit, nag-overtake ang motorsiklo sa ginasundan nga truck.
Tungod sa kadasigon sang iya pagpadalagan, nagdiretso siya sa center island.
May nagasunod nga isa pa ka truck sa motorsiklo pero nakapreno kag wala na nalapakan ang driver.
May suksok nga helmet ang driver pero tungod sa impact head injury ang gintunaan sang iya kamatayon. — Aksyon Maria Kayla Tingzon
