ILOILO— Nakuhaan sang 40 grams sang suspected shabu ang driver sang motorsiklo nga na-aksidente sa Brgy Talusan, Dumangas la-1:35 sang hapon kahapon, Hulyo 29.
Suno kay Police Major Samuel Vipinosa, hepe sang Dumangas Municipal Police Station, pakadto sa Brgy. Sapao sa amo man nga banwa ang motorsiklo nga ginamaneho ni alyas Niloy, 32-anyos, sang nagbungguanay sila sang isa pa ka motorsiklo nga pakadto sa banwa.
Sang gindala si Niloy sa ospital sa Barotac Nuevo, nanotisyaran sang gwardya nga may suspected shabu, suno sa police.
Sang gin-usisa sang police, nakit-an ang anum ka magagmay kag isa ka dako nga sachets suspected shabu sa bulsa sang driver kag naipit sa iya nga brief.
May standard drug price P272,000 ang suspected shabu nga na-recover sa inventory sang police.
Base sa pagpangusisa sang police, napreso na sadto ang driver sa kaso may kaangtanan sa illegal drugs kag nakagwa lang.
Padayon pa nga ginabulong sa ospital sa syudad ang driver nga fractured ang wala nga tiil. Samtang ginabulong naman sa ospital sa Dumangas ang driver sang isa pa ka motor. — via Aksyon Farrah Mae Morano
