ILOILO — Pilas sa ulo ang ginkapatay sang 28-anyos nga driver sang Suzuki Smash sang nag-overtake kag nabungguan ang ginasundan nga Kawasaki Bajaj sa Brgy. Teniente Benito, Tubungan la-1:30 kaina sang aga.
Involved sa aksidente ang magparyentehanay nga alyas Toto, driver sang Suzuki Smash, 17-anyos solterito nga iya angkas, kag ang 18-anyos nga si alyas Nono, driver sang Kawasaki Bajaj.
May okasyon sila nga ginkadtuan sa Guimbal kag papuli na kuntani sa Barangay Daga-ay, Tubungan.
Suno kay Police Captain Lunelyn Talamillo, officer-in-charge sang Tubungan Municipal Police Station, ma-overtake kuntani si Toto sa ginasundan nga Bajaj nga dala ni Nono.
Wala naantisipar ni Toto ang pagpundo ni Nono gani nakabunggo siya sa Bajaj.
Gindala pa sa ospital si Toto pero gindeklarar nga dead-on-arrival. Nakaagum naman sang gasgas sa nagkalain-lain nga parte sang lawas ang iya angkas kag driver sang Bajaj.
Lunsay wala sang suksok nga helmet ang magparyentehanay nga involved sa aksidente. — Aksyon Maria Kayla Tingzon
