ILOILO — Dead-on-arrival sa ospital ang 20-anyos nga driver sang motorsiklo sang nakabunggo sa naka-park nga tricycle sa kilid sang karsada sa Barangay Tabucan, Barotac Nuevo mga las-12:40 kaina sang kaagahon.
Suno kay Police Lieutenant Johnny Bundac, deputy chief of police sang Barotac Nuevo Municipal Police Station, ginalantaw nga madasig ang pagpadalagan sang driver gani naglapaw siya sa karsada kag nakabunggo sa motorsiklo nga yara sa guwa sang balay.
Sa imbestigasyon sang mga pulis, tungod kurbadahon ang dalan kag basa tungod nag-ulan kag nagapanalithi sang natabu ang aksidente, wala na nakabalanse ang driver gani naglapaw sa karsada.
Sa guwa sang gate sang balay naka-park ang motorsiklo pero naga-obstruct sa dalan.
Wala sang suskok nga helmet ang driver gani head injury ang gintunaan sang iya kamatayon.
Halin sa Barangay Salihid ang driver kag papuli sa Barangay Monpon pero wala na mausisa sang mga pulis kon ano ang ginhimo niya antes natabu ang aksidente. — Aksyon Maria Kayla Tingzon
