ILOILO — Patay ang 28-anyos nga driver sang motorsiklo sang nakabunggo sa nagapaliko nga pick up sa atubang sang Biscocho House sa Barangay Maliao, Pavia mga las-6 kagab-i, Hulyo 11.
Ginkumpirmar ini sang amay sang driver sang motorsiklo nga residente sang Abangay, Janiuay.
Suno sa amay nga si Joseph, las-5 sa hapon ang buhi sang iya bata nga Joey sa iya gina-ubrahan sa Jaro kag papuli na sang natabu ang aksidente.
Dugang ni Joseph, sa masami, mga las-6 sa gab-i yara na ang iya bata sa ila balay.
Gin-ako niya nga madasig magpadalagan sang motorsiklo ang iya bata kon may ginahingahaw.
Nagapadayon ang istoryahanay sang ginikanan sang driver sang motorsiklo kag driver sang pick up may kaangtanan iya civil liability sa natabu.
Una na ginpabutyag ni Police Major Jose Nemias Pamplona, hepe sang Pavia Municipal Police Station, nga wala sang salabton kriminal ang driver sang pick up base sa imbestigasyon. — Aksyon Maria Kayla Tingzon
