ILOILO — Dead-on-arrival sa ospital ang driver sang motorsiklo sang nakabunggo sumalang nga truck sa Circumferential Road 1 (C1) nga sakup sang Barangay Pakiad, Oton subong nga hapon.
Sa impormasyon sang Oton police, head injury ang gintunaan sang kamatayon sang driver sang motorsiklo. Samtang i-check pa nila ang kondisyon sang iya angkas nga gindala sa separado nga ospital.
Suno sa driver sang truck nga si Buddy, nakita na niya nga padulong ang motorsiklo amo nga naghinay siya.
Tungod nagapakurbada ang dalan kag madasig ang padalagan sang motorsiklo, nadanlog ini kag nakabunggo sa truck.
Nagtabog ang mga sakay sang motorsiklo.
Pareho nga may suksok nga helmet ang driver sang motorsiklo kag iya angkas.
Gindala na sa ospital ang mga sakay sang motorsiklo.
Pabalik sa ila warehouse sa Molo ang truck sang natabu ang aksidente.
Halin naman sa Mandurriao ang mga sakay sang motorsiklo kag padulong sa motorcycle shop para magtambay. — Aksyon Maria Kayla Tingzon
