Driver sang motorsiklo patay sang nasagairan sang kasugata nga motorsiklo sa Dingle

ILOILO — Patay ang 24-anyos nga driver sang motorsiklo sang nasagairan sang kasugata nga motorsiklo sa Brgy. Tabugon, Dingle kahapon.

Pakadto sa direksyon sang Dueñas ang Honda Click mga motorsiklo sang napatay samtang pakadto sa poblacion ang Rusi nga motorsiklo.

Suno kay Police Lieutenant Syvele Limjuco, deputy chief of police sang Dingle Municipal Police Station, naglapaw sa linya ang driver sang Rusi gani nasagairan sa wala nga porsyon ang Honda nga motorsiklo.

Tungod sa impact, nagtabog ang duha ka drivers nga nakaagum sang pilas sa nagkalain-lain nga parte sang ila lawas.

Ginhingagaw dala sa ospital ang driver sang Honda click pero gindeklarar nga dead-on-arrival.

Ginpahayag sang police nga nakainom sang makahulubog nga ilimnon ang driver sang Rusi nga motorsiklo.

Naka-hospital arrest ang driver sang Rusi nga natalana pasakaan sang kaso nga reckless imprudence resulting to homicide and damage to property sang pamilya sang napatay, suno sa police. — Aksyon Paula Elambayo