ILOILO — Positibo nga gin-identify sang asawa ang driver sang BMW sports car nga nagbunggo sa ila sang iya bana sa Brgy. Pandac, Pavia sang Hunyo 1 sang gab-i.
Ginkumpirmar ni Shefryl Garcia ang identity sang driver sang sports car paagi sa mga litrato nga ginpakita sa iya sang Pavia police.
Sa judicial affidavit sang asawa, ginpahayag niya nga nakilala niya ang driver sang ginpanaug ang bintana sang salakyan. Suno pa sa asawa, hubog ang driver nga gin-identify sang pulis kay alyas Bobot, kag iya duha pa ka upod.
Tatlo ka mga kaso ang natalana ipasaka sang Pavia police batok sa driver nga amo ang murder, frustrated murder kag malicious mischief.
Hingagawon nga ipasaka ang kaso bwas, Hunyo 7 ukon sa Lunes, Hunyo 10.
Sa impormasyon halin sa pulis, taga-Calinog ang suspek, may negosyo nga trucking services kag may mga propedad sa Iloilo City.
Nagapabilin sa ospital si Shefryl kag natalana operahan ang wala nga tiil.
Una na ginkumpirmar ni Police Master Sergeant Crisande Maquiling, imbestigador sang Pavia Police Station, nga severe head injury ang gintunaan sang kamatayon ni Rave Garcia sang ginbungguan sang sports car.
Gindala pa sa ospital ang biktima apang gindeklarar nga dead-on-arrival.
