Dry run sang mga first town PUJs pasulod sa Iloilo City himuon sang provincial gov’t antes ang pag-finalize sang LPTRP

ILOILO CITY – Ginahitsu pa ang ruta sang mga first town jeepneys halin sa probinsiya sang Iloilo pasulod sa siyudad sa ginaduso nga Local Public Transport Route Plan (LPTRP) sang Iloilo Provincial Government.

Ini tungod obserbahan sang Department of Transportation (DOTr) ang lima ka ruta sang mga first town jeepneys, suno kay Iloilo Provincial Planning and Development Office (IPPDO) Head Mario Nillos.

May hiwaton nga lima ka adlaw nga dry run subong nga bulan ang mga nagabyahe sa Oton-Iloilo City Loop; San Miguel-Festive Walk; Leganes- Iloilo City Loop; Leganes-La Paz, Iloilo City Loop; kag Pavia- Iloilo City Loop agud makita ang demand sang pasahero kag kun pila ka units ang mabyahe.

“Gusto nila nga mag-dry run sa [mga ruta] para at least mabal-an gid ‘ya nga amo na ang demand. Ang demand sina during peak hours kag during mga slack period. Tan-awon kun for example amo ni nga ruta pila gid bala ang actual nga kinahanglanon, ang demand sang mga pasahero kag i-record namon,” suno kay Nillos.

Gin-athag ni Nillos nga na-finalize na ang LPTRP sang probinsiya magluwas lang sa ruta sang mga first town jeepneys. Ang iban nga ruta, suno sa iya natalana nga isumiter sa DOTr.

Una na nga gin-aprubahan ang enhanced LPTRP sang Iloilo City Government kag wala naplastar diri ang ruta sang mga first town jeepneys tungod nakadepende ini sa LPTRP sang probinsiya.