End of an era | Main branch sang Socorro Drug Store sa Downtown Area manirado makaligad ang 78 ka tuig

ILOILO CITY — Permanente na nga manirado sa Hulyo 15 ang main branch sang Socorro Drug Store sa Downtown area makaligad ang 78 ka tuig nga operasyon. Ini ang ginpahibalo ni Mr. Jake Cocjin, bata ni the late Ruth Tirol Jarantilla nga bata man sang tag-iya.

Sa pagpangusisa sang Aksyon Radyo Iloilo News team sa management, madugay na nga nagakaputo ang botika tungod madamo sang kakumpetensiya. Magluwas diri, wala na sang may matutok sa operasyon sang botika kag sa iban pa nga mga rason.

Nagpadayon lang ang operasyon sang Socorro Drug Store tungod luyag ni the late Ruth Tirol Jarantilla, nga ipadayon ang legasiya sang pamilya, para makaserbisyo sa mga nagakinahanglan nga mga Ilonggos, kag para sa mga empleyado nga naga-income.

Sa Facebook post ni Mr. Cocjin, gnagalaum sila nga mabukas ang Socorro Drug Store sa Pavia.

Gintukod sang pamilya Tirol ang Socorro Drug Store sang 1949 kag nag-branch out sang lima ka drug stores sa JM Basa, Ledesma, Iznart Street sa City Proper, kag sa E. Lopez, Jaro.

Nangin bantog na sa mga Ilonggo ang main branch sang Socorro Drug Store kag nangin landmark na ini kon magpanaog sa jeep.

.