Estudyante na-hit and run sa Jaro; driver sang motorsiklo nag-surrender makaligad ang pila ka oras

ILOILO CITY — Yara na sa kustodiya sang Traffic Enforcement Unit ang driver sang motorsiklo nga nag-hit and run sa estudyante malapit sa exit sang West Visayas Medical Center sa Don Benito Ledesma, Jaro, pasado las-9:00 kaina sang aga.

Residente sang Brgy. Montinola, Jaro ang 29-anyos nga driver samtang tumandok sang Brgy. Culasi, Roxas, Capiz ang 20- anyos nga estudyante.

Suno kay Police Corporal Oliver Diaz sang Traffic Enforcement Unit, boluntaryo nga nag-surrender sa ila talatapan ang driver sa bulig sang barangay officials.

Halin sa La Paz padulong sa iya trabaho ang driver sang natabo ang insidente.

Tungod sa kakulba, wala na gintabangan sang driver ang estudyante nga ginpahayag nagkurog tuga sang impact sang pagkabunggo.

Gintinguhaan sang news team nga makuhaan sang pahayag ang driver apang ginpapuhay sang pulis makaligad nagkurog man sa kakulba. — ARI trainee Robert Nietes