Fish vendor pilason sang ginbuno sang supplier sang isda sa Antique

Pilason ang 54-anyos nga fish vendor sang ginbuno sang supplier niya sang isda sa Barangay Guisijan, Laua-an, Antique sang Lunes.

Ginkilala ang biktima kay Thomas Pantilagan residente sang amo nga barangay samtang ang suspek ginkilala kay Bambi Bandiola, 49-anyos sang Brgy. Jaguikican, Laua-an, Antique.

Suno kay Police Chief Master Sergeant Rey Villasis, imbestigador sang Laua-an Municipal Police Station, ma-remit kuntani sang kuwarta ang biktima sa suspek sang wala nag-intiindihanay kag may pagbinaisay nga natabo.

Lunsay yara sa impluwensiya sang makahulubog nga ilimnon ang biktima kag suspek suno sa police.

Gindala sa Angel Salazar Memorial General Hospital ang biktima nga nakaagum sang pilas sa tiyan nga estable na ang kondisyon.

Preso sa Laua-an Municipal Police Station ang suspek kag natalana pasakaan sang kaso nga frustrated murder. — ARI trainee reporter Robert Nietes