ILOILO CITY — ILOILO CITY — Ginhold-up sang tatlo ka mga suspek sakay sang motorsiklo ang gasoline boy sa Brgy. Lanit, Jaro pasado las-6 kagab-i, Enero 26.
Suno kay Police Captain Mavin Laraño, officer-in-charge sang Iloilo City Police Station 3, nagpakuno-kuno nga mapatughong sang gasolina ang mga suspek sakay sang motorsiklo.
Sa panaysayon sang gasoline boy, nagpalapit ang isa sa iya samtang nagpalayo ang isa ka suspek. Nag-iping ang isa ka suspek sa gasoline boy, may ginpakita nga pusil kag nagdeklarar sang hold-up.
May belt bag nga ginasuksok ang gasoline boy nga amo ang nakuha sang mga suspek. Ginabanta sa P5,000 ang kwarta nga nataban sa gasoline boy.
Sang naghalin ang mga suspek, nagpangayo sang bulig ang gasoline boy sa cashier nga yara sa CR sang natabo ang pagpanghold-up.
Nabaton sang Iloilo City Police Station 3 ang impormasyon tungod may nagtawag nga pulis nga na-assign sa Revitalized Pulis sa Barangay (RPSB) nga amo naman ang ginpangayuan sang bulig sang gasoline boy.
Nagresponde ang Iloilo City Police Station 3 sa lugar kag nag-imbestigar.
Lunsay nakasuksok sang sweatshirt ang mga suspek, duha ang nakasuksok sang helmet samtang naka-kalo ang isa.
Padayon ang hot pursuit operation sang mga pulis sa mga suspek. — Aksyon Paula Elambayo
