Ginareklamo sa “rentangay” modus sang salakyan arestado sa drug buy bust operation sa Pavia

PAVIA, ILOILO– Nadakpan sa drug bust operation ang 36-anyos nga babaye nga ginareklamo involved sa modus nga ‘rentangay.’

Sa operasyon sang Pavia Municipal Police – Station Drug Enforcement Team (SDET) kaina sang aga sa Barangay Balabag, Pavia, nakuhaan ang subject nga si alyas Mitch sang 12 ka sachets sang suspected shabu nga ginabanta nagabug-at sang 60 grams kag may standard drug price nga P408,000.

Suno kay Police Lieutenant Gary Tayongtong, deputy chief of police sang Pavia MPS, nakibot na lang sila nga madamo sang nagpadulong sa police station pagkatapos madakpan si Mitch kag nagpabutyag nga gin-scam kag biktima sila sang iya rentangay nga modus.

Dugang ni Tayongtong nga halin pa sang nagligad nga tuig ang monitoring nila sa subject pero wala sang impormasyon nga nakalab-ot sa ila may kaangtanan sa mga ginareklamo batuk sa iya.

Nagpamalibad si Tayongtong sa paghatag sang source ni Mitch tungod lakip na ini sa gina-monitor nila. — Aksyon Maria Kayla Tingzon