ILOILO — Lima ka sachets sang suspected shabu ang nakuha sa habal-habal driver nga gindakup sa checkpoint sa Barangay Poblacion, Dingle las-9 kagab-i.
Suno kay Police Captain Alwin Salmon, officer-in-charge sang Dingle Municipal Police Station, ginpapundo sa checkpoint si alyas Jun, 41-anyos nga taga-Dacal, San Enrique tungod wala sang plaka ang iya motorsiklo.
Ginapangayuan siya sang mga pulis sang mga dokumento pero wala siya sang napakita nga lisensiya kag rehistro sang iya motorsiklo.
Dugang pa ni Salmon, daw kaangay nga nagadali si Jun kag indi mapahamtang sang may nahulog nga box halin sa dashboard kag may nawasi nga sachet sang ginapatihan illegal nga druga.
Sang ginbuksan sang pulis ang box sa presensiya sang media representative kag kapitan sang barangay may apat ka sachets sang suspected shabu nga nakuha.
Halin sa direksyon sang Pototan si Jun kag pakadto sa direksyon sang merkado sang Dingle.
Nagpamalibad naman siya sa paghatag sang impormasyon sa kon diin siya makadto kag kon diin halin ang illegal nga druga nga iya dala.
Preso sa Dingle police station si Jun kag pasakaan sang kaso.
Nagakoordinar naman ang Dingle police sa San Enrique agud mahibaluan kon may record si Jun may kaangtanan sa pagbaligya sang illegal nga druga. — Aksyon Maria Kayla Tingzon
