ILOILO — Nakuhaan sang video ni Jhonn Lester Malco ang pagkalayo sa tasok sang patubig sa ila talamnan sa Brgy. Bagumbayan, Tigbauan kahapon sang aga, Enero 25.
Suno kay Lester, may hangin nga naga-upod sa tubig nga nagaguwa sa tasok rason nga napinsaran sang iya magulang nga sindihan ini. Nakibot na lang sila sang nag-igrab ang kalayo.
Ginpabutyag niya nga indi ang tubig ang nagakalayo kundi ang hangin nga naga-upod sa tubig. Wala man sang baho ang tubig kag ang hangin dugang pa ni Lester.
Naglawig suno sa iya sang kapin sa lima ka oras ang pagtubod sang tubig kag pagsungaw sang hangin sa tasok. Mga las-3 sang hapon nauntat ang pagtubod sang tubig kag wala naman sang may nagaguwa nga hangin.
Ini na ang ikaduha nga pagpatasok nanday Lester tungod wala sang tubig nga nagguwa sa una.
Ginkadtuan naman sang taga-Municipal Environment and Natural Resources Office kag BFP ang lugar agud mausisa.
