ILOILO CITY—Ma-hire sang duha tubtob tatlo ka hydrologists ang Iloilo City government nga amo ang mahimo sang third party assessment kag evaluation sa mga waterway projects sang Iloilo City District Engineering Office (ICDEO).
Ini sila ang mga eksperto sa UP Diliman nga ang focus sang pagtuon nakasentro sa urban flood assessment.
Base sa pagpanalawsaw sang Aksyon Radyo Iloilo, ginatun-an sang mga hydrologist ang mga hitabo kapareho sang pagbaha (Source: Maryville University|web).
Gina-evaluate man sang hydrologist ang impact sang human activities kapareho sang urban construction kag land development sa mga waterways kapareho sang suba kag creek sa mga pagbaha sa lokalidad (Source: sciencebuddies.org|web).
Suno kay Mayor Raisa Treñas, tun-an sang mga i-hire nga hydrologists ang epekto sang mga slope protection kag bike lane projects sang ICDEO sa Buntatala creek sa Jaro, kag Iloilo river nga sakop sang Mohon, Arevalo sa pagbaha nga na-eksperiyensyahan sa nakaligad nga duha ka semana nga epekto sang habagat.
Natalana pa nga mag-meeting ang alkalde upod sa mga hydrologists agud istoryahan ang sakop sang ila himuon nga assessment lakip na ang pagnegosyar sa ila nga professional fee.
Ginrekomendar kay Mayor Treñas sang Disaster Resilience Council ang amo nga mga eksperto kag suguran ang pagtuon sa labing madali nga tion. — Aksyon Marvin Malificiar
