ILOILO CITY — Tatlo na ang mangin judging areas para sa Kasadyahan sa Kabanwahanan kag Dinagyang Tribes Competition nga highlights sang Dinagyang Festival 2026.
Ini sang gin-anunsyar sang Iloilo Festivals Foundation Incorporated nga may ipahamtang nga judging areas sa corner Luna-Huervana Streets sa La Paz malapit sa Gaisano Mall.
Suno sa IFFI, ginpamatian lang nila ang panawagan sang publiko nga luyag makita ang final performance sang mga tribu.
Antes sini, gin-anunsyar na nga mangin judging areas ang Iloilo Freedom Grandstand kag Iloilo Sports Complex.
Ginpasiguro sang IFFI nga nagkonsulta sila sa mga nagapasakop nga tribu, Iloilo City Government kag iban pa nga stakeholders antes ang pagdesisyon.
Sa Enero 24 sang hapon, hiwaton ang Kasadyahan sa Kabanwahanan kag sa Enero 25 sang aga ang Dinagyang Tribes Competition. — Aksyon Marvin Malificiar
