Nanginwala ang kampo ni Iloilo City Congresswoman Julienne “Jam-Jam” Baronda nga may line-up na siya kag iya pamilya sa 2025 midterm elections.
Nauna na ginpabutyag ni Vice Mayor Jeffrey Ganzon nga sang nagligad nga semana, may ginpakita si Mayor Jerry Treñas sa iya nga picture sa tarpaulin sa diin nabutang nga mapa-reelect si Congresswoman Baronda.
Nabutang man nga “FOR MAYOR” ang padalaganan sang amay ni Congresswoman Baronda nga si Councilor Urminico Baronda, Jr., kag “FOR VICE MAYOR” si anay konsehal Lady Julie Grace “Love-Love” Baronda nga manghod ni Congresswoman Baronda.
Sa statement nga ginpadala sang opisina ni Congresswoman Baronda sa Aksyon Radyo Iloilo, gin-athag sang kongresista nga indi matuod nga may lineup na siya kag “paon” lang ang nagguwa nga picture “agud mahibaluan ang plano sa politika sang mga Baronda.”
Dugang pa sang statement, “Sa interview kay (Congresswoman) Jam-Jam sang damlag lang, iya ginapanindugan nga malayo pa ang eleksyon. Naga-focus ang kongresista sa subong sa padayun nga pagpatuman sang mga GUGMA projects.”
Sa pagpakig-angut sang Aksyon Radyo Iloilo kay Mayor Treñas, ginpabutyag sang alkalde nga indi na niya madumduman ang istoryahanay nila sang bise alkalde may kaangtanan diri.
Tubtob subong wala pa nga gin-anunsyar ni Congresswoman Baronda kun ano nga position ang iya padalaganan pagkatapos sang “political break-up” nila ni Mayor Treñas. — via Aksyon Justice Savvanah Pamplona
