ILOILO CITY – Ginkonsiderar sang Iloilo City Government nga magdeklarar sang state of calamity kun tuman nga maapektuhan ang supply sang tubig sa siyudad tungod sa El Niño phenomenon.
Suno kay Iloilo City Mayor Jerry Treñas, padayon ang pakig-istorya niya sa City Disaster Risk Reduction and Management Office (CDRRMO) agud mahibaluan kun nagakadapat na ang pagdeklarar sang state of calamity.
Sa subong suno sa alkalde, ginapa-monitor niya ang sitwasyon sang mga bubon ilabe pa nga gin-report sang CENRO nga may yara nga nagakahubsan tungod sa mainit nga panahon.
Base sa Memorandum Order sang National Risk Reduction and Management Office (NDRRMO), mahimo lang magdeklarar ang syudad, munisipalidad, banwa, ukon rehiyon sang state of calamity base sa pila ka mga condition ukon parametro.
Santu sa report sang PAGASA, naka-experiensiya ang siyudad sang dry spell ukon “below-normal” nga rainfall condition sa sulod sang tatlo ka bulan tungod sa epekto sang El Niño.
