LOILO CITY – Ginahandaan na sang Iloilo City Government ang posible nga epekto sang El Niño phenomenon sa siyudad ilabe na sa mga lugar nga nagasalig sang ginakonsumo nga tubig halin sa mga bubon.
Suno kay Engr. Neil Ravena, head sang General Services Office (GSO) kag anay head sang City Environment and Natural Resources Office (CENRO), 70% sang populasyon sa siyudad ang nagasalig sang tubig nga ginagamit sa ila pang-adlaw-adlaw halin sa bubon, samtang 30% ang dependent sa water district.
Naghimo sang survey ang siyudad agud matumod ang mga barangays nga tuman nga apektado tungod gina-forecast sang Department of Science and Technology (DOST) nga sa Mayo pa matahaw ang epekto sang El Niño.
Isa sa mga lihok sang city government nga mag-deploy sang water tankers nga may unod nga 2,000 liters sang tubig sa kada barangay nga ginakulang ang water supply halin sa bubon. Gilayon nga tughongan ang water tankers kun maubusan na sang tubig, dugang pa ni Ravena.
“We will deploy sang mga water tanks nga 2,000 liters para ma-ready ta na ang mga barangays nga maka-experience sang extreme weather condition,” suno pa kay Ravena.
Samtang, nagpangabay naman ang siyudad sa Metro Pacific Iloilo Water (MPIW) kag mga bulk water suppliers nga iprayoridad ang potable water ukon mainom nga tubig agud indi mawad-an ang mga pumuluyo sa siyudad.
