ILOILO CITY—Napilian ang Iloilo City nga mangin host sang mga events sang Association of South East Asian Nation (ASEAN) Summit 2026.
Ini na ang ikaduha nga kahigayunan nga gindala sa siyudad ang ASEAN event sa nakaligad nga 10 ka tuig sang nangin host man ang pungsod sang 2017.
Matandaan sang nagligad nga semana ginlunsar sa Intramuros, Manila ang Chairship sang Pilipinas sa ASEAN Summit 2026 kon diin ginhingadlan ang mga lugar kon diin himuon ang lain-lain nga aktibidad kag napilian ang siyudad upod ang Manila, Cebu, Bohol, Boracay, Laoag, Tagaytay, kag Clark.
Ginatutukan sang siyudad bilang preparasyon ang aspeto sang peace and order kag security para sa mapadulong nga mga bisita.
Ang ASEAN Summit ginakabig nga highest-level meeting sang pinakamataas nga policy-making body sang mga lideres halin sa Southeast Asia nga ginabug-usan sang Brunei, Cambodia, Indonesia, Laos, Malaysia, Myanmar, Philippines, Singapore, Thailand, Timor Leste, kag Vietnam. — Aksyon Marvin Malificiar
