Iloilo City mangin host sang 16th National Food Showdown

ILOILO CITY—Napilian nga mag-host ang Iloilo City sang ika-16 nga National Food Showdown, ang prestihiyoso nga culinary competition nga nagatingub sa mga culinary and hospitality schools, restaurants, kag hotels sa pungsod.

Gintalana sa Oktubre 2 tubtob 3 ang national culinary competition sa Iloilo Convention Center base sa memorandum of agreement nga ginpirmahan kanday Mayor Jerry Treñas kag Chef Myrna Segismundo sang National Food Showdown, upod sa taga-Iloilo Festivals Foundation, Inc. (IFFI).

Pagatawgon nga “Iloilo Gastronomy Competition, Kaon Ta!” ang kahiwatan nga maga-feature sang culinary arts, pastry, kag bartending contests kon diin kilala nga mga international kag Filipino celebrity chefs ang magaserbe nga judge.

Napilian ang siyudad nga host sang kompetisyon tungod sa pagkilala nga UNESCO Creative City of Gastronomy.

Overall Chairman sang kompetisyon si Chef Segismundo nga suno sa alkalde nangin parte sa gin-publish nga gastronomy book sang siyudad, kag mangin kabahin sa pag-manage sang kahiwatan ang siyudad kag IFFI. — Aksyon Marvin Malificiar