ILOILO CITY—Nag-hire sang traffic planner ang Iloilo City Government sa tunga sang nagalala nga traffic situation sa siyudad.
Ini ang ginkumpirmar ni Mayor Raisa Treñas paagi sa iya spokesperson, Joy Fantilaga-Gorzal.
Ang traffic planner amo ang nagahimo sang konsepto kag plano sa pag-improve sang traffic situation sa isa ka lugar. Nagahimo siya sang traffic reports kag ginapresentar ang resulta sa political body pareho sang Local Government Unit antes ang pag-coordinate sa ahensya nga maga-implementar sang iya rekomendasyon.
Suno kay Treñas, luyag niya nga ma-review kag ma-assess sang maayo ang ginapatuman nga sistema sa trapiko kag transportasyon sa siyudad subong kag i-angut niya ini sa pagbalay sang safety measures sa mga dalanon.
Ginapaabot sang alkalde nga sa pag-hire sang traffic planner, mahibaluan sang siyudad kon ano pa ang kulang ukon kinahanglan nga bag-uhon sa ginapatuman nga sistema.
Madugay na nga ginapanawagan sang Aksyon Radyo Iloilo ang pagpahamtang sang traffic planner ukon traffic engineer nga may ihibalo kon ano ang maayo nga himuon sa sitwasyon sang traffic sa siyudad.
Sa subong, ginapamunuan ni Ret. Col. Uldarico Garbanzos, anay director sang Iloilo City Police Office, ang Traffic and Transportation Management Office (TTMO). — Aksyon Marvin Malificiar
