Gindeklarar nga Grand Winner ang Iloilo Dinagyang Festival sa Best Cultural Festival sa Highly Urbanized City Category sang 2025 Association of Tourism Officers of the Philippines (ATOP) Pearl Awards.
Ang nasambit nga pagkilala ginahatag sa mga kapiyestahan sa pungsod nga nagapreserbar sang cultural identity kag may impact sa adlaw-adlaw nga kabuhi sang ila nasakupan.
Ginbaton nanday Iloilo Festivals Foundation, Incorporated (IFFI) Executive Director Joyce Ann Clavecillas, Iloilo City Tourism Officer Junel Ann Divinagracia, kag PESO Manager Gab Umadhay ang pagkilala sa ginhiwat nga awarding ceremony sa Baguio City kagab-i.
Sa iya Facebook post, ginpasalamatan ni Mayor Raisa Treñas ang IFFI, San Jose Parish Placer, kag mga tribu nga nagpasakop sa Dinagyang Festival lakip na ang mga eskwelahan kag barangay nga nagapadayon sa pagpreserbar sang kultura kag kapiyestahan sang siyudad. — Aksyon Marvin Malificiar
