Walo ka ektarya sang duta sa Brgy. Guinobatan, New Lucena nga ginapanag-iyahan sag Iloilo Provincial Government ang gintanyag ni Iloilo Gov. Arthur Defensor, Jr. para mangin lokasyon sang bag-o nga Hall of Justice building.
Ginpresentar ini ni Gov. Defensor sang nakigsapol sa iya sanday Court Administrator Ma. Theresa Dolores Gomez-Estoesta kag Region VI Court Manager Judge Jennie Ann Logronio agud mangayo sang assistance kon may available nga duta ang probinsiya para sa nasambit nga proyekto.
Isa ang natumod nga lote sa mga initial sites sang Government Center nga nahamtang sa subong sa Santa Barbara.
Nahibaluan nga sang damlag lang, gin-suspend ang operasyon sa Hall of Justice para maghatag ligwa sa assessment sa structural integrity sang building makaligad ang asud-asod nga mga linog.
Sa subong temporaryo nga ginpahamtang sa pila ka propedad sang provincial government ang mga opisina sang Hall of Justice agud makapadayon sa pagserbisyo.
Nahamtang sa Casa Real ang regional office sang Public Attorney’s Office kag ang Iloilo City District Office 1 kag 2 samtang yara naman sa Iloilo Sports Complex ang Iloilo Provincial Prosecutor’s Office. — source | Iloilo Provincial Government (BHK)
