ILOILO CITY — Nadiskubrehan nga ginransak sang wala pa makilala nga mga indibidwal ang Iloilo Supermart sa Tabuk Suba, Jaro las 8:50 kaina sang aga.
Sa imbestigasyon sang Jaro police, sa drainage system nag-agi ang mga suspek kag naghimo sang buho sa sulod sang daan nga entrance sang supermarket nga subong wala na ginagamit.
Sa pagpati sang police, indi lang isa ang may kahimuan sini.
Nakita man sa lugar ang duyan nga gingamit sang mga suspect agud makasaka sa second floor sa diin ginbuhuan pa gid ang pader lapos sa second floor sang supermarket.
Posible nga kaina sang kaagahon ukon kagab-i pa natabu ang insidente kadungan sa pagbubo sang mamunog nga ulan.
Naglab-ut sa P1.5 million nga benta ang nadula. —via Maria Kayla Tingzon
