Indi na maka-agwanta ang Ilongga OFW sa kapintas sang iya nga ama sa Hong Kong.
Suno kay April Jane Dadula sang Poblacion North, Oton, halos walo pa lang siya ka bulan nga nagatrabaho sa Hong Kong.
Anum ka bulan siya sa iya una nga employer. Pero nagsaylo sa China ang iya employer gani nagpangita siya liwat sang maobrahan.
Wala nagdumdom si Dadula nga mapintas ang iya bag-o nga ama nga masami suno sa iya nagapauli nga hubog kag pila ka beses na siya nga naakigan.
Ginasundan man siya kun magpanglimpyo sa bisan diin nga parte sang balay kag kun tapos na, ginapasulit pa gid sa iya.
Nakaagi suno sa iya nga ginhanaan siya nga tampaon sang iya ama gani nga kinulbaan siya kag nagdesisyon nga mauntat na bisan duha ka tuig kuntani ang iya kontrata.
Kahapon, naglisensya na nga manaug sa building sa diin sila naga-istar si Dadula. Sang yara sa lobby sang building, naghambal ang bana sang iya ama nga buksan ang iya luggage kag nagpasugot man si Dadula pero sa kondisyon nga sa atubang sang CCTV camera.
Diri na suno sa iya nagwara-wara ang iya ama gani nga nag-Facebook live na siya agud may ebidensya siya kun ano gid man ang matabu.
Na-capture sa live streaming ang pagkuga sang iya ama kay Dadula gani nangayo siya sang bulig.
Nag-abot man ang police kag gindakup ang ama ni Dadula.
Sa subong, may ginateniran nga boarding house ang OFW kag ginabuligan man siya sang iya agency sa pagproseso sang mga kinahanglan agud makapauli.
Ginpanugyanan man si Dadula nga mag-file sang reklamo batuk sa iya ama. —via Paula Jane Elambayo
