ILOILO – Wala sang kamatuoran ang impormasyon nga may nagapang-kidnap sa Brgy. Poblacion East, Oton, base sa pag-validate sang police.
Suno kay Lt. Col. Abner Jordan, hepe sang Oton Municipal Police Station, wala man sang barangay official nga nag-report sa ila parte sa grupo nga nagapanguha sang bata. Apang sang nabatian niya sa balita ang parte diri, gani gilayon nila ini nga gin-imbestigaran.
Paathag sang police, “nag-over think” lang ang isa sa mga residente tungod sa picture nga ginpasa sa iya sang iya himata parte sa ginapahayag grupo nga nagapang-kidnap. Nagpinsar siya nga miembro sang grupo ang indi pamilyar nga tawo nga nagbalik-balik sa ila barangay rason nga naglapta ang sugilanon.
Bisan ang kapitan sang barangay suno kay Lt. Col. Jordan ang wala gilayon nagdangop sa police tungod indi pa ma-establisar ang impormasyon.
Ginklaro man sang police nga wala sang nag-attempt nga mang-kidnap sa barangay.
Madumduman nga napuhag ang mga taga-Poblacion East sang nagligad nga semana tungod gin-alegar nga may lalaki nga nangdapit sang bata kag nagdalagan sang ginsita sang isa sa mga residente. — via AM Reports
